Во својот прв твит откако го загуби својот статус како пакистански премиер, Имран Кан го впери прстот кон неименувани странски сили за кои тој тврди дека се мешале во работите на земјата. Гласањето за недоверба што го собори беше одржано рано во неделата.
„Пакистан стана независна држава во 1947 година; но борбата за слобода повторно започнува денес против странскиот заговор за промена на режимот“, напиша Кан. Тој додаде дека „секогаш народот на земјата го брани својот суверенитет и демократија“.
Pakistan became an independent state in 1947; but the freedom struggle begins again today against a foreign conspiracy of regime change. It is always the people of the country who defend their sovereignty & democracy.
— Imran Khan (@ImranKhanPTI) April 10, 2022
Кан, крикет ѕвездата, кој стана политичар, ја презеде функцијата во 2018 година. Сепак, неговата партија ПТИ практично го загуби мнозинството во Националното собрание во март кога седум пратеници од нејзиниот коалициски партнер одлучија да се приклучат на редовите на опозицијата. Ривалите го обвинија Кан за економски и политички неуспеси.
Сега веќе екс-премиерот тврдеше дека опозицијата постапува по волја на странска сила. Уште во петокот, Кан во обраќањето рече дека е „подготвен за борба“ и дека нема да прифати „увезена влада“, додавајќи дека е решен „жестоко да агитира против неа“.
Додека упатуваше слични обвинувања во минатото, тој еднаш го именуваше Вашингтон како играч зад наводниот заговор. Беше објавено дека Кан добил брифинг писмо од пакистанскиот амбасадор во САД, кое вклучувало снимка од висок американски функционер што имплицира дека односите меѓу двете земји ќе се подобрат доколку Кан повеќе не е на власт. Според Кан, Вашингтон сакал тој да замине поради неговата подготвеност да води независна надворешна политика и поради неговата посета на Москва кон крајот на февруари. Американскиот Стејт департмент ги отфрли сите такви наводи.
Пакистанското национално собрание во понеделник ќе гласа за нов премиер. Кандидатот на ПТИ е Шах Мехмуд Куреши, кој беше министер за надворешни работи, но сега го додаде зборот „поранешен“ на својот профил на Твитер . Опозициската партија пакистанската муслиманска лига-Наваз го номинираше Шехбаз Шариф, брат на поранешниот премиер Наваз Шариф, за свој кандидат за функцијата.