Денес Турција официјално го напушти меѓународниот договор чија цел е борба против насилството врз жените, т.н. Истанбулска конвенција.
Турскиот претседател Реџеп Таип Ердоган претходно најави дека Анкара ќе се повлече од договорот, што предизвика жестоки критики и дома и во странство.
Најавени се протести во повеќе турски градови поради повлекувањето од Истанбулската конвенција, која Ердоган ја објави во март и која стапи на сила денес.
Конвенција на Советот на Европа за спречување и борба против насилството врз жените и семејното насилство, т.н. Истанбулската конвенција е документ од 2011 година, потпишан од 45 земји и ЕУ.
Тоа е првиот правно обврзувачки и сеопфатен меѓународен механизам за борба против насилството врз жените и семејното насилство.
Конвенцијата обезбедува нова и детална меѓународна правна рамка за поефикасно искоренување на овие форми на насилство.
Одлуката на Ердоган да ја повлече својата земја од конвенцијата, иако бројот на убиства на жени во Турција расте во последните десет години, го предизвика гневот на организациите за правата на жените и критичарите на ЕУ, САД и ООН.
Турската влада ја објасни својата одлука со изјава дека Истанбулската конвенција „ги поткопува семејните вредности “ и „сака да ја покаже хомосексуалноста како нормална“ затоа што повикува луѓето да не бидат дискриминирани според нивната сексуална ориентација.
За разлика од многу земји со мнозинство муслимани, хомосексуалноста не е забранета во Турција со закон, но хомофобијата е широко распространета, соопшти новинската агенција АФП.
Аналитичарите ја толкуваат одлуката на Ердоган пред се како негова желба да собере конзервативен електорат во контекст на економските тешкотии со кои се соочува земјата.
„Ова повлекување испраќа опасна порака до оние кои вршат насилство, осакатуваат или убиваат: им кажува дека можат да продолжат да го прават тоа со целосно неказнивост“, рече шефицата на Амнести Интернешнл, Агнес Каламар.
„Во однос на правата на жените, Турција се врати десет години наназад“, додаде таа.
Минатата година 300 жени беа убиени во Турција од страна на нивните партнери или поранешни партнери, според Здружението за правата на жените, „Да ставиме крај на убиствата на жени“. Досега годинава се убиени 189 жени.