Русија е на врвот на листата на земји од чија територија се вршат сајбер напади против САД, но Вашингтон не верува дека руските власти се вклучени во тоа, изјави заменик-помошникот државен адвокат Ричард Даунинг. Рускиот сенатор Владимир Џабаров рече дека тоа е добар сигнал.
– Без сомнение, Русија е на првото место на таа листа. Не би тврдел дека руската влада стои зад овие напади, но навистина веруваме дека руските власти не прават се што можат за да го спречат тоа – рече Даунинг во американскиот Сенат.
Тој исто така додаде дека во последните месеци не е забележано дека активноста на сајбер нападите е значително намалена.
Според зборовите на првиот заменик-претседател на комитетот на Советот на федерацијата за меѓународни работи, Владимир Џабаров, објавата на американското Министерство за правда е добар сигнал.
– Кај американската страна, разумот конечно триумфираше. Таа изјава е добар сигнал што укажува на тоа дека нашите земји ќе ги здружат напорите во борбата против овој проблем и дека експертите конечно ќе започнат да работат заедно – рече Џабаров.
Тој посочи дека во Америка, очигледно, конечно сфатиле дека Русија нема причина да „оневозможи какви било американски постројки за преработка на месо и млеко“.
– Хакери, хулигани се занимаваат со тоа, и како што рече нашиот претседател неколку пати, Русија и Соединетите држави треба заедно да се борат против тоа – посочи Џабаров.
Западот постојано ја обвинува Русија за мешање во внатрешните работи и сајбер нападите. Русија ги негираше сите обвинувања, велејќи дека западните земји немаат докази. Москва исто така најави дека е подготвена за дијалог за сајбер безбедноста.
Претходно денес, Русија ја достави до Специјалниот комитет на ООН првата нацрт-конвенција во светот за борба против компјутерскиот криминал и криминалната употреба на крипто-валути.