Повиците на Шолц за признавање на независноста на Косово предизвикаа бес во Белград, според германскиот телевизиски канал N-TV, кој патувањето на канцеларот на Балканот го нарекува прошетка низ дипломатско минско поле. Така, српскиот претседател Александар Вучиќ на прес-конференција со Шолц рече дека неговата земја нема тенденција да потклекне на таквите притисоци и закани, иако никогаш не одбила дијалог.
Канцеларот Олаф Шолц предизвика бес во Белград со своите изјави за признавањето на Косово, објави германскиот телевизиски канал N-TV. „Значи, можете да разберете: ние не реагираме на овој начин на притисок кога некој ни се заканува, а потоа мораме да направиме нешто“, рече српскиот претседател Александар Вучиќ по средбата со Шолц во Белград. Вучиќ истакна дека „денес првпат слушнав од ЕУ дека е потребно взаемно признавање“.
За време на неговата посета на Приштина, Шолц рече за напорите на Косово и Србија за пристапување во ЕУ: „На крајот на денот, договорот треба да го разјасни и прашањето за признавање на Косово; затоа што е незамисливо две земји кои не се признаваат меѓусебно да станат членки на ЕУ“. Шолц мирно реагираше на огорченоста на Вучиќ, која ја изрази на заедничката прес-конференција. Според германскиот канцелар, тој „кажа нешто очигледно. Можеби тоа ќе помогне“.
Србија, која го смета Косово за своја одметната провинција, „исто така сака територијален интегритет “, исто како и Украина, нагласи Вучиќ. „Сепак, ние сме подготвени да разговараме за компромисни решенија“ , рече тој. Србија „никогаш не одби“ дијалог. „Ако мислите дека треба да ни се заканите… немаме ништо против. Вие работете ја ваша работа, ние нашата “, резимира српскиот претседател.
Шолц, пак, истакна дека негова цел е успешен пристап на земјите од Западен Балкан во Европската унија – „не само во многу далечна иднина, туку што е можно поскоро“. Ќе биде „многу добро ако се оди напред со голема храброст“, рече тој. Конфликтот меѓу Србија и Косово остана нерешен многу години, што ги попречува изгледите за пристап во ЕУ за двете балкански држави. Владата во Белград не ја признава поранешната јужна територија на Србија, Косово како независна држава, објаснува германски ТВ канал.
Шолц го завршува своето балканско патување во сабота со посета на Македонија и Бугарија. Прво доаѓа во Скопје и се среќава со премиерот Димитар Ковачевски. Главна тема на преговорите со Македонија е пристапот на земјата во ЕУ, блокиран од Бугарија. Владата во Софија бара Македонија прво да ги признае бугарските корени на нејзиниот јазик, население и историја.
Попладне Шолц треба да пристигне во главниот град на Бугарија, каде што е предвидено да се сретне со премиерот Кирил Петков. Германскиот канцелар најави дека сака да ја брани реалната перспектива за влез во ЕУ за земјите од Западен Балкан. Некои од нив долги години се кандидати за членство во ЕУ без никаков напредок. Посетата на Шолц на Балканот доаѓа додека Русија се обидува да го прошири своето традиционално силно влијание во регионот на поранешна Југославија, нагласува германскиот телевизиски канал N-TV.