Светиот синод на црквата на Грција, знаејќи дека вакцинацијата е најголем чин на одговорност кон ближните, им препорачува на сите, во консултација со нивниот лекар, да го искористат овој дар од Бог, за самите да се заштитиме, но да ги заштитиме и другите, пишува во циркуларното писмо „Црквата и науката во борбата со пандемијата“, испратено од Светиот синод на ГПЦ до сите соборни храмови и цркви и кое ќе им се прочита на верниците за време на литургијата во недела, јави дописничката на МИА од Атина.
Ова е уште еден доказ дека црквата како институција оддамна ја изгубила врската со Бог и дека е нераскинлив дел на системот. Злоупотребата на верските чувства на верниците и нивна манипулација за нечесни цели од позиција на религиски авторитет е еклатантно кршење на основните принципи на христијанството, слободата на избор. За жал вакви примери имаме во целата православна екумена, а не само во грчката православна црква.
Веста од ГПЦ ви ја пренесуваме во целост:
Синодот на ГПЦ, ги повикува верниците „да го слушаат гласот на науката и на експертите“ и додаваат дека многу пати, преку социјалните мрежи се шират непроверени ставови, „на кои им недостасува научност, но и црковен дух“.
Затоа, заедно со циркуларното писмо, за информирање, како на верниците, така и на свештените лица, изготвен е мал прирачник „Христијаните нè прашуваат за вакцината, а лекарите ни одговараат“, кој содржи одговори на 12 прашања, теории, митови, сомнежи поврзани со вакцината против Ковид-19, меѓу кои и оние дека „вакцината содржи микрочип“ или „клетки од ембрион“ или „ги менува личните особини“.
-Вакцините против Ковид-19 не содржат микрочип. Ова се нереални теории кои се темелат на кампања на интернет за дезинформација, пишува во одговорот на надлежните лекари на прашањето за микрочиповите.
За теоријата дека „вакцината содржи клетки од ембрион и кога ќе ја примиш е како да го убиваш ембрионот за ти да живееш“, лекарите, во одговорот објаснуваат дека „ниту една од вакцините што се користат во Грција не содржи ембрионални клетки“, а категорични се и во однос на прашањето дека по вакцинацијата се контролираат личните особини.
-Вакцината не влијае на личните особини на вакцинираното лице, пишува во одговорот во упатствата „Христијаните не прашуваат за вакцината, а лекарите ни одговараат“.
Одговорите на прашањата се куси и јасни, а опфатени се теми поврзани и со репродуктивното здравје на вакцинираните, разликата меѓу традиционалните вакцини и mRNA вакцините, мутацијата Делта итн.
На крајот од прирачникот, од ГПЦ истакнуваат дека имаат доверба во научната заедница, „која деноноќно се бори за ослободување на луѓето од смртоносната пандемија“, а човештвото веќе има на располагање вакцина, која може да подигне ѕид во ширењето на пандемијата.
Додаваат дека вакцинацијата е најголем чин на одговорност кон ближните, а вакцината не е во никаква спротивност со учењето на црквата.
-Па така, членовите на црквата можат слободно, според упатството на нивниот лекар, да изберат чин на вакцинација, без било каков страв дека овој избор ќе влијае врз нивниот однос со Бога и црквата, пишуваат од ГПЦ.
На последниот состанок на Светиот синод на ГПЦ минатата седмица, присутни беа и министерот за здравство на Грција Василис Кикиљас и епидемиологот Сотирис Циодрас кои членовите ги информираа како за вакцината, така и за текот на пандемијата во земјата.