Поранешниот руски претседател и еден од најблиските сојузници на Путин, Дмитриј Медведев ги обвини Соединетите Држави дека водат војна против Русија преку Украина, откако американскиот Претставнички дом одобри пакет помош од 40 милијарди долари за Украина.
Медведев рече дека американската економија ќе страда и дека нацрт-законот усвоен од Претставничкиот дом во вторникот е обид да се „нанесе сериозен пораз на Русија и да се ограничи нејзиниот економски развој и политичкото влијание во светот“.
„Тоа нема да проработи. Печатницата со која Америка постојано го зголемува својот веќе надуен државен долг ќе се распадне пред ние да се распаднеме“, рече тој. Тој ги обвини, како што ги нарече, американските „русофобични власти“ за поскапувањето на горивата и храната во САД.
Претседателот на руската државна дума, Вјачеслав Володин, го обвини Вашингтон дека го искористил пакетот помош за да ја „задолжи“ Украина и дека наместо плаќање, ги присвоил резервите на жито во земјата.
„Вашингтон сака холодомор во Украина“, напиша тој, мислејќи на гладот од 1930-тите кој уби милиони Украинци.