Русија може да понуди 25 милиони тони жито за извоз преку пристаништето Новоросијск од 1 август до крајот на оваа година, изјави постојаниот претставник на Русија во ОН Васили Небензја на состанокот на Советот за безбедност на ОН за конфликти и безбедност на храната.
Според него, Русија и понатаму останува одговорен снабдувач со храна и енергија.
„Годинава очекуваме рекордно висок принос на пченица. Во таа смисла, можеме да понудиме 25 милиони тони жито за извоз од пристаништето Новоросијск од 1 август до крајот на оваа година“, рече Небензја.
Тој додаде дека може да се разговара и за други набавки со оглед на тоа што потенцијалниот извоз на ѓубрива од јуни до декември би изнесувал најмалку 22 милиони тони.
„Но, ако немате намера да ги повлечете сопствените санкции, тогаш зошто нè обвинувате нас“, рече тој.
Небензја, исто така, се прашуваше зошто најсиромашните нации и региони мора да страдаат поради неодговорните геополитички игри на Западот.
Според него, во сегашните околности, обидите неоправдано да се префрли одговорноста за влошувањето на состојбата со храната во светот на Русија, не само што се апсурдни, туку претставуваат светогрдие.