УНГАРСКИОТ премиер Виктор Орбан го спореди либерализмот со „вирус“ во неговиот воведен говор на Конференцијата за политичко дејствување на конзервативците. Говорот на Орбан се фокусираше на борбата против woke културата, а се занимаваше и со контроверзни теми како трансродовите и ЛГБТК+ правата, миграцијата и содржината на образованието за децата, пишува Асошиетед прес .
Откако доби овации, Орбан рече дека Унгарија стана „светски позната“ по својата тврдокорна миграциска и културна политика и на присутните им понуди рецепт за спроведување слични политики дома. „Нема миграција, нема род, нема војна“, нагласи Орбан, повикувајќи ја публиката да се фокусира на овие прашања во нивните земји.
„Тие вештачки ја делат нацијата за да поттикнат конфликт“
„Унгарија е всушност инкубатор каде што се спроведуваат експерименти за иднината на конзервативните политики. Унгарија е место каде што не зборувавме само за поразување на прогресивците и либералите и за предизвикување конзервативен христијански политички пресврт, туку всушност го направивме тоа“, продолжи тој.
Орбан рече дека либерализмот има тенденција да ги деградира нациите, што доведе до тоа Западот да заостанува зад Азија во економските и демографските показатели. „Движењето Woke и родовата идеологија се токму она што беа комунизмот и марксизмот. Тие вештачки ја делат нацијата на малцинства за да поттикнат конфликт меѓу групите“, додаде тој.
Зборуваше и Такер Карлсон
Унгарскиот премиер беше првиот европски национален лидер кој јавно ја поддржа кандидатурата на поранешниот претседател Доналд Трамп во 2016 година, а исто така изрази поддршка за кампањата на Трамп во 2020 година. Тој повтори дека „денес немаше да има војна во Украина, доколку Трамп беше претседател на САД“.
„Вратете се, господине претседателе, направете ја Америка повторно голема и донесете ни мир! истакна тој, со силен аплауз од публиката. Поранешниот водител на Фокс њуз, Такер Карлсон, исто така кратко зборуваше преку видео врска, едно од неговите први јавни настапи откако FOX мрежата го отпушти во април.