Рускиот амбасадор во Македонија Сергеј Баздникин ќе почека за да биде повикан на средби со македонскиот државен врв, иако се понуди во секој момент да ја објасни ситуацијата во Украина и да одговори на секое прашање за односите помеѓу двете земји. Тој е подготвен да се сретне со претседателот на државата Стево Пендаровски, со премиерот Димитар Ковачевски и со министерот за надворешни работи Бујар Османи, но сè уште не добил покана.
Претседателот на државата Стево Пендаровски нема намера да го повика Баздникин на состанок, а таква намера, како што неодамна изјави, нема ни шефот на македонската дипломатија Бујар Османи. Од Кабинетот на премиерот Димитар Ковачевски, иако побаравме, нема одговор дали тој ќе се сретне со рускиот амбасадор.