Во Советот за безбедност на ОН, Русија стави вето на резолуцијата на Америка и Албанија, во која се вели дека референдумите во регионите ДНР, ЛНР, Запорожје и Херсон не се признаваат.
Текстот на резолуцијата ги осудува постапките на Русија, која „организираше нелегални таканаречени референдуми во регионите на Украина, во меѓународно признатите граници“. Постапките на Русија беа окарактеризирани како незаконски, при што беше заклучено дека тие не можат да бидат основа за промена на статусот на четирите региони.
За резолуцијата гласаа 10 земји, додека четири беа воздржани, вклучувајќи ги Кина и Бразил.
Авторите ги повикаа сите земји, меѓународни организации и специјализирани структури да не ја признаваат промената на статусот на „регионите Луганск, Доњецк, Херсон и Запорожје во Украина“. Исто така, се апелира да не се признава анексијата на четири региони кон Русија.
Во документот се повикува Москва веднаш да ги повлече своите сили од Украина, пренесува Спутник.
Постојаниот претставник на Русија во ОН Василиј Небензја изјави дека одредени колеги од Советот за безбедност на ОН ги прекршиле правилата за пристојност и го допреле дното, обидувајќи се да усвојат резолуција со која се осудува членка на Советот за безбедност.
„Некои од нашите колеги од Советот за безбедност го допреа дното, скршена е онаа мала пристојност што, како што ни изгледаше, сè уште постоеше во оваа сала. Не знаеме ниту еден пример кога Советот за безбедност усвоил резолуции со директно осудување на една од членките на Советот. Кажи ми, дали сериозно мислиш дека Русија може да размисли и да поддржи таков проект?“, рече Небензја.