Во ЕУ има жестока борба бидејќи повеќето земји сакаат позитивна одлука за обете држави(Македонија и Албанија), плашејќи се дека во случај на ново одложување, ЕУ ќе го изгуби кредибилитетот и земјите од регионот ќе се откажат од натамошни реформи, што може да го дестабилизира регионот. Европската комисија исто така се залага за започнување преговори со обете држави и потврди дека сите услови се исполнети.
Најголем противник на започнувањето на преговорите е Франција, која сака не само одложување, туку и натамошен застој во процесот на проширување. Франција испрати предлог до другите земји да ја променат својата методологија за проширување за да го направат процесот „постепен, поконкретен и ефективен“. Бара Европската комисија да излезе со конкретен предлог за примена на оваа методологија следната пролет.
Очигледно, Французите сакаат да го забават проширувањето на ЕУ и да чекаат прво да се случат внатрешни реформи во Унијата.
Холандија има сличен став како Франција, со тоа што се согласува да започне преговори со Македонија, но не и со Албанија. Хрватска е силно за отпочнување преговори со обете држави. Но, во процесот на проширување, одлуките се донесуваат едногласно, па затоа е можно денес да се одложи за крајот на неделава и со министрите оваа задача да биде пренесена на шефовите на држави или влади, кои се состануваат во Брисел во четврток и петок.