РУСКОТО Министерство за надворешни работи денеска соопшти дека петмина дипломати од хрватската амбасада во Москва ќе бидат протерани од земјата, како одговор на протерувањето на руските дипломати од Загреб.
На 11 април, Хрватска објави дека протерала 18 руски дипломати и шестмина членови на административно-техничкиот персонал од амбасадата во Загреб. Еден ден подоцна, Руската Федерација изрази силен протест до хрватските власти и се закани со одмазда.
Според РИА Новости, руското Министерство за надворешни работи денеска го поканило хрватскиот амбасадор на разговор и изразило силен протест против протерувањето на руските дипломати и соопштило дека како одговор на потезите што претходно ги направи официјален Загреб, петмина вработени во хрватската амбасада во Москва ќе биде прогласена за непожелни.
– Во руското Министерство за надворешни работи денеска беше поканет хрватскиот амбасадор во Руската Федерација Томислав Цар. Поради неоснованите обиди на хрватските власти да ја обвинат Русија за воени злосторства во Украина и хрватското испраќање воена помош за неонацистичкиот режим во Киев, изразен е силен протест – се наведува во соопштението на веб-страницата на руското Министерство.
– Како одговор на непријателските потези кои Загреб ги направи претходно со цел да го намали бројот на членовите на руската дипломатска мисија, на Цар му беше врачено решение со кое петмина вработени во хрватската амбасада се прогласени за непожелни во Русија – се наведува во соопштението.