Израелскиот министер за финансии Авигдор Либерман е додаден во базата на податоци за „непријателите на Украина“ на контроверзната веб-страница Миротворец во неделата.
Авторите на страницата, за која се верува дека имаат врски со украинските безбедносни служби, го опишаа Либерман како „руски агент на влијание“, кој манипулирал со јавно значајни информации во корист на Москва. Тие, исто така, го обвинија за учество во акти на „хуманитарна агресија“ против Украина.
Меѓу дејствијата што доведоа до ставање на Либерман на списокот, беше неговото одбивање да финансира израелска теренска болница во Украина во март и неговиот неутрален став за тоа кој е виновен за масакрот во киевското предградие Буча во април. Веб-страницата, исто така, сподели врска до статија, во која се тврди дека тој имал врски со рускиот гасен гигант Гаспром.
Украинските власти честопати го изразуваа своето разочарување од нивото на поддршка што ја добиваа од Израел за време на конфликтот со Русија. Земјата му обезбеди на Киев само хуманитарна помош и одбранбена опрема за спасување животи, но не и оружје и муниција. Израел, исто така, се воздржа од приклучување кон меѓународните санкции кон Москва. Минатата недела Либерман рече дека израелската помош за Украина од избувнувањето на борбите меѓу Русија и Украина кон крајот на февруари изнесува околу 40 милиони долари.
Либерман е министер за финансии од 2021 година. Тој е политичар ветеран, кој во текот на годините зазема различни високи позиции во израелската влада, вклучително и министер за надворешни работи, министер за одбрана и заменик премиер.
64-годишникот е и шеф на „Израел Беитеину“ (Израел наш дом), кој има седум места во парламентот на земјата, Кнесетот. Либерман е роден во Кишињев, Молдавија кога републиката беше дел од Советскиот Сојуз и емигрирал во Израел во 1978 година.
Веб-страницата Миротворец, беше отворена во 2014 година, позиционирајќи се како независна база на податоци управувана од анонимни модератори за да им помогне на украинските власти и „специјалните служби“ да ги фатат проруските терористи, сепаратисти и воени злосторници, меѓу другите.
Сепак, некои ја означија базата на податоци како „список за убиства“, кој е поддржан од владата, откако неколку поединци, вклучувајќи ги писателот Олес Бузина, политичарот Олег Калашников и руската новинарка Дарја Дугина беа убиени набргу откако нивните профили се појавија на веб-страницата.Најновите додатоци од висок профил на Миротворец ги вклучија претседателот на Казахстан, Касим-Жомарт Токаев, ко-основачот на Пинк Флојд, Роџер Вотерс. Имаше тврдења дека најбогатиот човек на светот, Илон Маск, бил ставен во базата на податоци во средината на октомври, но брзо бил отстранет од неа. Наводното дополнување се случи откако Маск понуди мировен план, кој предвидуваше Киев да и отстапи територии на Москва.