Познатиот американски економист Џефри Сакс во интервју за германски „Шпигел“ изјави дека украинската војна ја гледа како неуспех на Западот, бара од Германија пристап до Путин и вели дека натамошните санкции против Русија се премногу ризични.
Тој вели дека антируските санкции нема да ги постигнат своите цели и ќе влијаат само на Западот, па затоа не верува во нивната ефикасност.
Сакс беше советник на руската влада во 1990-тите и се смета за експерт за земјите во развој.
– Предвидувам различен развој на настаните: значителни негативни последици за економијата на остатокот од светот, освен за Русија – рече Сакс.
Економистот ги нарече санкциите типична алатка на американската надворешна политика. Сепак, и покрај честата примена, рестриктивните мерки ретко функционираат, нагласи американскиот експерт и како пример ги наведе санкциите кон Иран, Северна Кореја и Венецуела, кои „мизерно пропаднаа“.
– Не ги сменивме режимите таму, а сега сакаме да фрлиме на колена многу поголема земја. Русија е огромна земја, која има и 1.600 нуклеарни боеви глави на располагање. Да се фрли Русија на колена е едноставно нереално, невозможна идеја. Не знам што им е во мислите на тие луѓе што го смислиле – рече американскиот експерт и додаде дека Русија „лесно ќе ги преживее“ последиците од воведените санкции.