Венецуелскиот претседател Николас Мадуро го обвини Западот дека се обидува да ја „распарчи“ Русија со сеопфатните санкции против Москва поради нејзината воена кампања во Украина. Земјата на Мадуро живее под големо американско ембарго од 2019 година.
„Тие се редат, економски, политички и дипломатски (на Запад) за голема војна против Русија. Ние од Венецуела ги осудуваме“, рече Мадуро во телевизискиот говор во петокот, додавајќи:
„Тие сакаат војна што ќе ја распарчи Русија, ќе ја уништи и ќе стави крај на надежта дека може да има мултиполарен свет во кој сите ќе можеме да живееме.
Јужноамериканската земја го осуди гласањето во четвртокот на Генералното собрание на ОН за суспензија на Русија од Советот за човекови права на глобалната организација. Венецуелскиот министер за надворешни работи Феликс Пласенсија рече дека потегот „ги крши мостовите“ неопходни за дијалог и „сериозно ги загрозува безбедноста, редот и глобалниот мир“.
Соединетите држави воведоа неколку рунди санкции кон Венецуела во 2019 година, што влијаеше, меѓу другото, и на нејзината нафтена индустрија. Вашингтон отворено го поддржа политичкиот противник на Мадуро Хуан Гуаидо, додека Мадуро го обвини Западот дека се обидува да го собори. Венецуела беше во центарот на вниманието на јавноста во минатото бидејќи се зборуваше дека американскиот претседател Џо Бајден се обидува да обезбеди нафта преку оваа земја, но Мадуро стана значаен сојузник на Москва во последниве години .