Москва – Русија целосно ќе се повлече од Договорот за отворено небо на 18 декември годинава, соопшти денеска Министерството за надворешни работи на оваа земја.
“Русија ги извести сите потписнички на договорот за одлуката за повлекување од Договорот за отворено небо шест месеци по објавувањето на излезот. Затоа, нашиот излез ќе се случи на 18 декември”, се вели во соопштението на руското Министерство за надворешни работи.
Руското Министерство додаде дека сите членки на Договорот, како и нивните белоруски партнери биле информирани за напуштање на групата.
По одлуката на Русија и денешното соопштение дека ќе се повлече од Договорот за отворено небо, се огласи НАТО, наведувајќи дека Алијансата „длабоко жали за одлуката на Русија да се повлече од договорот“.
„Жал ни е што слушнавме дека Русија се повлекува од договорот, што е правно обврзувачки инструмент, бидејќи придонесува за транспарентност, безбедност и стабилност, како и за взаемна доверба во евроатлантската област. Русија долг низ на години одбиваше да ги исполни своите обврски од отворениот договор „, меѓу другото, со воведување забрани за прелети на регионот Калининград, како и области во близина на руската граница со Грузија“, соопштија од седиштето на НАТО во Брисел.
Северноатлантскиот сојуз соопшти дека „многу пати ја повикувал Русија да се придржува до договорот, преземајќи одредени чекори за решавање на прашањата за усогласеност“.
Наместо тоа, се додава, „Русија не успеа да учествува во договорот конструктивно, не презеде чекори за враќање на целосната усогласеност со договорот“.
“Ние ги споделуваме загриженоста на Америка и причините што ги наведе во одлуката. Ние остануваме посветени на контролата на конвенционалното вооружување како клучен елемент на евро-атлантската безбедност. Ние ќе продолжиме да се стремиме кон конструктивни односи со Русија, кога руските акции ќе дозволат да се вратиме до целосна усогласеност со Договорот за отворено небо “, заклучува НАТО.
Договорот за отворено небо е во сила од 2002 година и брои 34 члена и им овозможува на земјите-членки отворено да собираат информации за воените сили и активностите на другите членки.