Претседателите на Турција и Русија, Реџеп Таип Ердоган и Владимир Путин, денеска официјално го отворија гасоводот „Турски тек“ со симболично завртување на вентилот поставен на сцена, а на сцената им се придружија српскиот претседател Александар Вучиќ и бугарскиот премиер Бојко Борисов.
Путин рече дека отворањето на гасоводот „Турски тек“ е важно не само за Русија и Турција, туку и за другите јужноевропски земји. Пуштањето во употреба на гасоводот го потврдува партнерството меѓу Русија и Турција, изјави Путин на церемонијата.
Тој потсети дека веќе три децении Русија испорачува 24 милијарди кубни метри гас во Турција, а сега околу два милијарди кубни метри гас ќе тече низ два цевководи. За жал, ние сме во регион каде ситуацијата е сериозна, но Турција и Русија покажуваат поинаков пример и соработуваат во интерес на народите на двете земји и на Европа, рече Путин.
Голем дел од гасот е планиран за турскиот пазар, а една гранка која се уште е во изградба треба да ја снабдува енергијата во земјите од Европа и Европската унија (ЕУ) во иднина.
Турција ќе добие 15,7 милијарди кубни метри гас годишно, благодарение на пуштањето во употреба на гасоводот „Турски тек“, рече турскиот министер за енергетика Фатих Донмез во официјалната церемонија. Новите две цевки треба да ја снабдат Турција со 15,75 милијарди кубни метри гас, со капацитет на гасоводот од 31 милијарди кубни метри годишно. Гасоводот е долг 930 километри и делумно оди под Црното Море. Работници од обете страни на гасоводот, од Русија и Турција, исто така, учествуваа на церемонијата преку видео-врска.