Утрово голем облак од чад е забележан на околу 7 километри западно од центарот на Лавов. Градоначалникот вели дека зградата што била користена за поправка на авиони до градскиот аеродром била погодена во раните утрински часови, но нема извештаи за жртви.
Досега беше помирно во западна Украина отколку во остатокот од земјата и се користеше како безбедно засолниште, засолниште за луѓето кои бегаат и како рута за снабдување, и за хуманитарни и за воени цели. Лавов е најголемиот град во западна Украина. Има околу 720.000 жители и се наоѓа на само 80 километри од полската граница. Областа на градот досега не е нападната, со исклучок на нападот од пред пет дена кога беше нападнат воениот камп за обука Јаворив, на 30 километри од Лавов.
Најмалку три експлозии се слушнале утрово, јави телевизијата Украина 24 . Украинското воено воздухопловство соопшти дека од Црното Море биле истрелани шест крстосувачки ракети. Два проектили се уништени од противвоздушната одбрана. Тие тврдат дека биле нападнати и од тип проектил Kh-555 кој бил лансиран од стратешки бомбардери, јавува Би-Би-Си .