Претседавачот на Долниот дом на британскиот Парламент, Џон Беркау вечерва соопшти дека го прифатил барањето на премиерката Тереза Меј, пратениците утре по третпат да се изјаснат за Договорот за Брегзит, што Владата во Лондон го постигна со ЕУ лани во нормври.
Беркау, кој досега одбиваше да го стави Договорот на ново гласање, со образложение дека Парламентот не може постојано да гласа за еден ист документ, изјави дека овој пат станува збор за нов предлог, што значително се разликува од досегашниот.
Британската Влада претходно соопшти дека планира да предложи трето гласање за Договорот за Брегзит во текот на утрешниот ден, но дека чека одобрение од Беркау.
– Признаваме дека секој предлог што ќе биде ставен на гласање треба да биде во согласност со одлуката на спикерот, изјави шефицата на конзервативната пратеничка група во Парламентот, Андреа Лидсом, која по функција е и членка на Владата на Меј.
Таа нагласи дека единствен начин Велика Британија да биде сигурна дека ќе ја напушти ЕУ на 22 мај, е до утре до 23 часот по локално време (полноќ по средноевропско време) Парламентот да го одобри Договорот за Брегзит.
Меј минатата недела побара од лидерите на ЕУ одлагање на Брегзит до 30 јуни, кој првично беше предвиден за утре. Но, шефовите на држави или влади на членките на Унијата одобрија одлагање на Брегзит најдоцна до 22 мај, под услов Парламентот во Лондон да го прифати Договорот за британското истапување од ЕУ. Според одлуката на Европскиот совет, доколку Парламентот не го прифати документот, Велика Британија ќе мора да ја напушти Унијата на 12 април без договор.