Свет

Ердоган: „Сопрете го огнот“, Путин: „Киев нека го положи оружјето“

„Ердоган ја истакна важноста од преземање итни чекори сега за прогласување прекин на огнот, отворање хуманитарни коридори и потпишување мировен договор“, соопшти кабинетот на турскиот претседател.

Турскиот претседател Реџеп Таип Ердоган во неделата повика на „итен општ прекин на огнот“ во Украина во разговорите со рускиот колега Владимир Путин , кој е подготвен да го стори тоа само кога Украина ќе престане да се бори и ќе ги исполни руските барања.

Прекинот на огнот ќе ја ублажи загриженоста за тешката хуманитарна ситуација, рече Ердоган во телефонски разговор, се вели во соопштението од неговиот кабинет.

„Претседателот Ердоган рече дека сегашниот прекин на огнот не само што ќе ја ублажи загриженоста за хуманитарната ситуација во регионот, туку и ќе ја отвори можноста за барање мирно решение и го повтори својот повик „заедно да го отвориме патот за мир“, соопшти неговата канцеларија. „Ердоган ја истакна важноста од преземање итни чекори сега за прогласување прекин на огнот, отворање хуманитарни коридори и потпишување мировен договор“, соопшти кабинетот на турскиот претседател, цитиран од Ројтерс.

Путин рече дека операцијата се одвива според планот и распоредот и изрази надеж дека украинските преговарачи ќе имаат конструктивен пристап во разговорите и ќе ја земат предвид ситуацијата на теренот, соопшти Кремљ.

Би било „наивно“ да се очекуваат резултати од преговорите меѓу Украина и Русија додека се водат борби, рече Ердоган.

Турскиот министер за одбрана во неделата повика на итен прекин на огнот што ќе и овозможи на Анкара да ги евакуира своите граѓани од Украина.

Двајцата државници разговараа неколку дена пред Дипломатскиот форум во јужниот турски град Анталија од 11 до 13 март, на кој се очекува да присуствува и рускиот министер за надворешни работи Сергеј Лавров.

Турција сака министрите за надворешни работи на Украина и Русија да дојдат и да разговараат на форумот, но не е сигурна дали ќе можат да учествуваат. 

Ердоган, кого Путин го нарекува „пријател“, разговарал со него на 23 февруари, ден пред руската инвазија. Со денешниот телефонски разговор, Ердоган е третиот лидер на земја членка на НАТО кој разговара со Путин од почетокот на офанзивата, по германскиот премиер и францускиот претседател.Турција има добри односи со Русија во одбраната, трговијата, енергетиката и туризмот, бидејќи секоја година е домаќин на милиони Руси, но исто така продаде беспилотни летала на Украина, што ја налути Москва и се спротивстави на руската политика во Сирија и Либија, како и на руската анексија на Крим. 2014 година

Related posts

Leave a Comment

error: Content is protected !!