Лидерот на француската левичарска коалиција, Нова народна еколошка и социјална унија (Нупес), Жан-Лук Меланшон, вечерва изјави дека францускиот претседател Емануел Макрон претрпел изборен пораз по вториот круг од парламентарните избори , пренесува француската ТВ мрежа. Франција24.
„ Тоа е сосема неочекувана ситуација. Поразот на партијата на претседателот е целосен и јасното мнозинство не е на повидок “, им рече Меланшон на приврзаниците во Париз.
Меланшон, инаку лидер на радикалната левичарска партија Непокорена Франција, рече дека резултатите се „пред се изборен пораз на Макрон и неговите соработници“ и дека тоа е „морален пораз“ на оние кои „на сите им даваат лекции нон – стоп“.
„Франција го кажа своето, и тоа мора да го признаеме, со не доволно силен глас, бидејќи апстиненцијата е сепак преголема, што значи дека голем дел од Франција не знае кому да се обрати“, додаде Меланшон.
Центристите на Макрон собрани во коалицијата Енсембле вечерва го загубија апсолутното мнозинство во парламентот по вториот круг од изборите, се резултати од излезните анкети по затворањето на гласачките места.
Доколку ова биде официјално потврдено, тоа ќе биде голем чекор наназад за францускиот претседател, кој ќе мора да склучува договори и сојузи за спроведување на неговите реформи во следните пет години од претседателствувањето.
Според првите резултати од излезните анкети, центристичката коалиција Енсембле на Макрон освои меѓу 200 и 260 места, додека за апсолутно мнозинство потребни се најмалку 289 од 577 места во парламентот.
На второ место е левичарската алијанса предводена од Меланшон, со 150 до 200 пратенички места. Екстремно десничарската партија национален собир на Марин Ле Пен ќе добие од 60 до 100 места, што е значително подобрување за партијата.