Директорот на „Роскосмос“, Дмитриј Рогозин изјави дека идеите на шефот на компанијата „Спејс Х“, Илон Маск, за масовните летови до Марс се апсурдни и бајка.
– Инженерите разбираат дека тоа е целосно апсурдно – рече Рогозин на Меѓународниот економски форум во Санкт Петербург.
Според него, можно е да се лета до Марс само во таканаречениот „прозорец на лансирање“ (временски период погоден за лансирање ракета) што се отвара еднаш на секои две години. Во тој случај, патниците ќе летаат како „сардини во конзерва“ девет месеци во една насока и ќе чекаат две години да пристигнат други ракети со залихи.
– На луѓето им се допаѓа тоа. Ефектот е „вау“. Всушност, нема ништо зад тоа, освен успешен маркетинг потег. И има многу луѓе кои раскажуваат такви бајки – додаде Рогозин.
За летовите кон Месечината
Тој исто така додаде дека Русија и Кина можат да ги надминат Соединетите држави во обид да испратат човек на Месечината.
– САД сè уште не полетаа. Засега не е познато, можеби Кинезите ќе полетаат порано, или ние – рече Рогозин за радиостаницата „Комерсант ФМ“.
Тој посочи дека нема да го „вжешти“ расположението на општеството и да влезе во „глупави натпревари“ што може да се спореди со „скокање во вреќа во правец на Месечината“ – со лет што е бесмислен од научна точка поглед.
– Ако почнеме да истражуваме некоја планета, Месечината, треба да го знаеме следниот чекор, третиот, четвртиот, петтиот, што ќе правиме, како ќе го започнеме тоа истражување таму. Престанете да мавтате со знамиња – рече генералниот директор на „Роскосмос“.
Да потсетиме, на почетокот на февруари, на виртуелната конвенција на Марсовското здружение 2020, Маск изјави дека неговата цел е да создаде самоодржлив град на Марс пред потенцијалната Трета светска војна.
Маск постојано зборуваше за своите планови да го колонизира Марс и да изгради ракета „Старшип“ за таа цел.