Унгарскиот премиер Виктор Орбан во петокот ја обвини Европската комисија за „легализирано хулиганство“, за поведувањето постапка против неговата влада за, како што велат, дискриминација на ЛГБТ луѓето.
Европската комисија започна постапка во врска со унгарскиот закон за забрана за унапредување на хомосексуалноста и промена на полот на малолетници, што Орбан го опиша како постапка за заштита на правата на децата.
„Ова е легализирано хулиганство. Ставот на Европската комисија е срамен“, рече Орбан во петокот за државното радио.
Тој рече дека дебатата им овозможува на Унгарците увид во „европскиот живот“ и во наставата во германските училишта. Тој повтори дека Унгарија нема да дозволи ЛГБТ активисти да „маршираат“ низ училиштата, промовирајќи, како што вели, сексуална пропаганда.
Групите за ЛГБТ-права остро го критикуваа законот, а лидерот на Европската комисија Урсула фон дер Лајен го оцени како срамен.
Постапка беше иницирана и против Полска затоа што некои општини се прогласија за зони ослободени од ЛГБТ идеологијата.
Ова е последен во низата конфликти меѓу Брисел и некои источни членки за низа прашања, како што се владеењето на правото, миграцијата и медиумските слободи.
Орбан, кој е на власт од 2010 година, вели дека ЕУ се обидува да и наметне начин на воспитување деца на Унгарија.
Анти-ЛГБТ кампањата, што неговата влада ја засили во текот на изминатата година, веројатно ќе има значајна улога пред парламентарните избори следната година.
Во текот на последните две недели, големи сини билборди беа поставени низ целата земја со пароли како: „Дали сте иритиран од Брисел“ и „Дали се плашите дека вашите деца ќе бидат изложени на сексуална пропаганда“.
Орбан, исто така, во петокот посочи дека ќе има конфликт околу планот за закрепнување на Унгарија, кој сè уште трае. Унгарија на крајот ќе добие зелено светло на Комисијата, предвидува Орбан.