Рускиот министер за одбрана Сергеј Шојгу изјави дека околу 600 странски платеници биле убиени за време на специјалната воена операција во Украина во последните две недели.
Тој, исто така, на конференциска врска истакна дека повеќе од 500 платеници ја напуштиле украинската територија.
„Во текот на изминатите две недели, повеќе од 500 платеници ја напуштија земјата, а уште околу 600 беа уништени“, рече Шојгу.
Според него, „продолжуваат насочените акции за пронаоѓање и уништување на странските платеници“.
„Како резултат на високопрецизни удари врз центри за обука на платеници, како и борбени загуби, евидентирано е намалување на нивниот број на територијата на Украина“, нагласи министерот.
Претходно руското Министерство за одбрана објави видео од уништувањето на базата на странски платеници во Украина со проектили Искандер.