Руското гранатирање на хемиската фабрика Азот во украинскиот град Северодонецк во саботата предизвика голем пожар откако истече еден тон нафта, а во соседната провинција Доњецк, објавија руските медиуми, забележан е огромен облак од чад кој се крева по експлозија во градот Авдиивка во кој се наоѓа уште една хемиска фабрика, пренесува Ројтерс.
Неделни жестоки борби се водат за Северодонецк, град со околу 100 000 жители пред војната, лоциран во провинцијата Луганск, кој стана стратешки важен фокус за двете страни бидејќи тоа значи контрола на целиот Луганск во источна Украина. Поголемиот дел од градот беше уништен.
Вчера проруската администрација објави дека фабриката Азот е опколена и дека внатре биле заробени од 300 до 400 украински борци. Родион Мирошники од руската администрација, исто така, преку Телеграм напиша дека таму може да бидат затекнати до 500 цивили, кои се кријат во засолништето на фабриката и кои тој ги опиша како „заложници“. Украинскиот гувернер одговори дека оваа информација е лага и дека фабриката се уште не е опколена. „Нашите сили продолжуваат да ја држат индустриската зона Северен Доњецк и ги напаѓаат и уништуваат руските воени сили во градот“, напиша тој. Тој, исто така, изјави за украинската државна телевизија дека борбите се водат во близина на самата фабрика. Хајдај додаде дека очекува руските сили да ги искористат сите свои напори за да се обидат да го заземат градот денес или утре.
Гувернерот на Луганск Серхи Хајдај не кажа дали пожарот бил изгаснат во фабриката во која се засолниле стотици цивили и ветерани. Хајдај рече дека во Северен Доњецк се без прекин жестоките борби. Претходно, тој исто така рече дека руските сили контролираат поголем дел од градот, но дека Украина ја контролира хемиската фабрика за азот.
Главниот штаб на украинските вооружени сили преку фб соопшти дека украинските бранители во саботата го одбиле рускиот напад во еден дел од Северен Доњецк, додека борбите продолжуваат во друг. Украинските сили, исто така, го потиснаа рускиот напад врз три мали градови северозападно од Славјанск во провинцијата Доњецк, додека борбите продолжуваат во четвртата населба во областа, како и на истокот од градот. Под силно гранатирање е и Лисичанск, град преку реката Доњецк од северен Доњецк, јавува Би-Би-Си. Зеленски ги нарече Северен Доњецк и Лисичанск „мртви градови“. Киев тврди дека војната се претворила во „артилериски конфликт“ и дека нивната војска нема муниција.
Руската новинска агенција РИА објави видео од Доњецк на кое се гледа голем облак чад кој се издига од градот Авдиивка, кој моментално го држат украинските сили и се наоѓа северно од Доњецк, кој е под контрола на руските сепаратисти. На почетокот на мај, најмалку 10 лица загинаа, а 15 беа ранети во руско гранатирање на фабрика за кокс во Авдиивка, изјави регионалниот гувернер. Фабриката за кокс во градот припаѓа на украинската фабрика за челик Метинвест БВ, која во март соопшти дека гранати ја погодиле територијата на фабриката, оштетувајќи некои од нејзините капацитети. Фабриката веќе престана со работа по рускиот напад.