БЕРЛИН – Германско-украинските односи повторно се разнишани по изјавата на шефот на фракцијата на владејачката Социјалдемократска партија на Германија (СПД) во германскиот Бундестаг, Ролф Мицених дека е на „терористичката листа“ на Украинската влада.
Мицених на седницата на конвенцијата рече дека е на таа листа затоа што се залага за примирје и дека ако тоа е критериумот, на списокот треба да се стави и генералниот секретар на ОН Антонио Гутереш.
Тој рече дека се дискриминирани сите оние кои како него сакаат да се залагаат за дипломатија во врска со прекинот на руската војна против Украина.
Мицених во изјава за весникот „Зидојче цајтунг“ ги повтори критиките кон украинските власти, но сега без да наведе дека е на „терористичката листа“.
Тој рече дека е иритиран што се наоѓа на некаков список поради неговата наводна поддршка за теророт и страдањата што Русија му ги предизвикува на украинскиот народ со својата агресија само затоа што се залага за примирје.
Мицених истакна дека тоа нема да го спречи да продолжи да ја поддржува Украина и во исто време да се залага за меѓународни дипломатски иницијативи.
Украинското Министерство за надворешни работи ги отфрли тврдењата на Мицених, наведувајќи дека украинската влада нема никаков список на терористи.
Портпаролот на Министерството, Олех Николенко, на Фејсбук нагласи дека Украина не води никаква постапка против Мицених и дека сите изјави на Мицених се невистинити.
Мицених беше на списокот на Центарот за борба против дезинформации на Советот за национална безбедност и одбрана на Украина, кој беше објавен на интернет во јули.
На него имаше повеќе од 70 личности, кои беа обвинети дека го поддржуваат наративот на руската пропаганда, а Мицних беше наведен дека е за прекин на огнот.