Одлуката на американскиот претседател Џо Бајден да подели 7 милијарди долари од замрзнати авганистански средства за обештетување на жртвите од терористичкиот напад на 11 септември и за хуманитарна помош, предизвика бес кај Авганистанците.
Бајден во петокот потпиша извршна наредба со која се отвора патот за распределба на авганистанските средства чувани во САД за хуманитарна помош за земјата и за компензација на американските жртви од нападите на 11 септември.
Авганистанските групи, вклучително и поранешни политичари, академици и талибанците, изразија бес поради одлуката на Бајден. „ Американската кражба и запленувањето на замрзнатите пари на авганистанскиот народ е најниско ниво на човечка и морална дезинтеграција на земјата и народот “, напиша на Твитер високиот портпарол на талибанците Мохамед Наим Вардак.
Меѓу терористите немаше Авганистанци
Многу Авганистанци напишаа на социјалните мрежи дека Бајден краде пари од многу заслужни Авганистанци кои немаат никаква врска со тероризмот во САД. Нема Авганистанци меѓу терористите вклучени во нападот на Светскиот трговски центар во Њујорк во 2001. Осама бин Ладен, лидерот на Ал Каеда, подоцна беше убиен во Пакистан.
Експертите велат дека распределбата на замрзнатите средства како што е наведено во декретот на Бајден ќе биде непоправлив удар за авганистанската економија. „Ова во суштина е враќање на Авганистанците нивните сопствени пари како хуманитарна помош, а во исто време ја задушува економијата“, напиша авганистанскиот политички аналитичар и истражувач Мохсин Амин на Твитер.